1Cor 12 | KhmKCB | STEP | បងប្អូន អើយ ! ចំពោះ សេចក្ដី ខាង វិញ្ញាណ ខ្ញុំ មិន ចង់ ឲ្យ អ្នករាល់គ្នា នៅ ល្ងង់ខ្លៅ ទៀត ទេ

1 Corinthians 12

1 បងប្អូនអើយ! ចំពោះសេចក្ដីខាងវិញ្ញាណខ្ញុំមិនចង់ឲ្យអ្នករាល់គ្នានៅល្ងង់ខ្លៅទៀតទេ 2 អ្នករាល់គ្នាដឹងហើយថាកាលអ្នករាល់គ្នាជាសាសន៍ដទៃនៅឡើយគេបាននាំអ្នករាល់គ្នាទៅឯរូបព្រះដែលមិនចេះនិយាយគឺតាមតែគេដឹកនាំ 3 ដូច្នេះហើយទើបខ្ញុំប្រាប់អ្នករាល់គ្នាឲ្យដឹងថាគ្មានអ្នកណាម្នាក់និយាយដោយនូវព្រះវិញ្ញាណរបស់ព្រះជាម្ចាស់ថាព្រះយេស៊ូត្រូវបណ្ដាសារហើយបើគ្មានព្រះវិញ្ញាណបរិសុទ្ធទេក៏គ្មានអ្នកណាម្នាក់អាចនិយាយបានថាព្រះយេស៊ូជាព្រះអម្ចាស់ដែរ។ 4 មានអំណោយទានផ្សេងៗគ្នាមែនប៉ុន្ដែមកពីព្រះវិញ្ញាណតែមួយទេ។ 5 មានមុខងារបម្រើផ្សេងៗគ្នាមែនប៉ុន្ដែមកពីព្រះអម្ចាស់តែមួយទេ។ 6 មានសកម្មភាពផ្សេងៗគ្នាមែនប៉ុន្ដែគឺជាព្រះជាម្ចាស់តែមួយទេដែលធ្វើការសព្វគ្រប់តាមរយៈមនុស្សទាំងអស់ 7 ដ្បិតមនុស្សម្នាក់ៗបានទទួលការបើកសំដែងមកពីព្រះវិញ្ញាណសម្រាប់ជាប្រយោជន៍រួម 8 គឺម្នាក់ទទួលបានពាក្យសំដីប្រកបដោយប្រាជ្ញាតាមរយៈព្រះវិញ្ញាណម្នាក់ទៀតទទួលបានពាក្យសំដីប្រកបដោយចំណេះដឹងតាមរយៈព្រះវិញ្ញាណដដែល 9 ម្នាក់ទៀតទទួលបានជំនឿហើយម្នាក់ទៀតទទួលបានអំណោយទានប្រោសឲ្យជាតាមរយៈព្រះវិញ្ញាណដដែល 10 ម្នាក់ទៀតធ្វើការអស្ចារ្យម្នាក់ទៀតថ្លែងព្រះបន្ទូលម្នាក់ទៀតចេះសំគាល់វិញ្ញាណម្នាក់ទៀតនិយាយភាសាចម្លែកអស្ចារ្យហើយម្នាក់ទៀតបកប្រែភាសាទាំងនោះ 11 ប៉ុន្ដែគឺជាព្រះវិញ្ញាណតែមួយដដែលទេដែលធ្វើការទាំងអស់នេះទាំងចែកចាយដល់មនុស្សម្នាក់ៗរៀងៗខ្លួនតាមដែលព្រះអង្គសព្វព្រះហឫទ័យ។ 12 ដ្បិតដូចដែលមានរូបកាយតែមួយហើយមានអវយវៈច្រើនអវយវៈទាំងឡាយរបស់រូបកាយទោះជាច្រើនមែនប៉ុន្ដែរួមគ្នាមកជារូបកាយតែមួយទេហើយព្រះគ្រិស្ដក៏ដូច្នោះដែរ 13 ព្រោះយើងទាំងអស់គ្នាបានទទួលពិធីជ្រមុជទឹកទៅក្នុងរូបកាយតែមួយដោយសារព្រះវិញ្ញាណតែមួយមិនថាជនជាតិយូដាឬជនជាតិក្រេកមិនថាបាវបម្រើឬអ្នកមានសេរីភាពឡើយគឺព្រះជាម្ចាស់ប្រទានឲ្យយើងទាំងអស់គ្នាផឹកព្រះវិញ្ញាណតែមួយ 14 ដ្បិតរូបកាយក៏មិនមែនមានអវយវៈតែមួយដែរគឺមានច្រើន 15 ទោះបីជើងនិយាយថា៖ «ខ្ញុំមិនមែនជារបស់រូបកាយទេព្រោះខ្ញុំមិនមែនជាដៃ» ក៏ជើងនៅតែជារបស់រូបកាយមិនថាមានហេតុផលនេះក៏ដោយ 16 ហើយទោះបីត្រចៀកនិយាយថា៖ «ខ្ញុំមិនមែនជារបស់រូបកាយទេព្រោះខ្ញុំមិនមែនជាភ្នែក» ក៏ត្រចៀកនៅតែជារបស់រូបកាយមិនថាមានហេតុផលនេះក៏ដោយ 17 បើរូបកាយទាំងមូលជាភ្នែកតើនឹងស្ដាប់ឮនៅត្រង់ណា? បើរូបកាយទាំងមូលជាច្រចៀកតើនឹងស្រង់ក្លិននៅត្រង់ណា? 18 ប៉ុន្ដែព្រះជាម្ចាស់បានដាក់អវយវៈនិមួយៗនៅក្នុងរូបកាយតាមព្រះអង្គសព្វព្រះហឫទ័យ 19 ហើយបើទាំងអស់ជាអវយវៈតែមួយតើរូបកាយនៅឯណា? 20 ដូច្នេះទោះជាមានអវយវៈច្រើនក៏ដោយក៏រូបកាយតែមួយ 21 ហើយភ្នែកមិនអាចនិយាយទៅដៃថា៖ «ខ្ញុំមិនត្រូវការឯង» ឬក្បាលនិយាយទៅជើងថា«ខ្ញុំមិនត្រូវការឯង» បានដែរ។ 22 ផ្ទុយទៅវិញអវយវៈណាដែលមើលទៅដូចជាខ្សោយជាងគេនៅក្នុងរូបកាយនោះត្រលប់ជាសំខាន់វិញ 23 រីឯអវយវៈណាដែលយើងគិតថាអាប់ឱនជាងគេនៅក្នុងរូបកាយនោះយើងសម្អិតសម្អាងឲ្យកាន់តែថ្លៃថ្នូរហើយអវយវៈរបស់យើងណាដែលមើលទៅមិនស្អាតនោះត្រលប់ជាកាន់តែស្អាតឡើង 24 ប៉ុន្ដែអវយវៈរបស់យើងដែលស្អាតហើយនោះមិនត្រូវការសម្អិតសម្អាងឡើយដ្បិតព្រះជាម្ចាស់បានផ្គុំរូបកាយឡើងដោយប្រទានឲ្យមានតម្លៃកាន់តែវិសេសដល់អវយវៈណាដែលមានការខ្វះខាត 25 ដើម្បីកុំឲ្យមានការបែកបាក់នៅក្នុងរូបកាយផ្ទុយទៅវិញឲ្យអវយវៈទាំងឡាយខ្វល់ខ្វាយចំពោះគ្នាទៅវិញទៅមក។ 26 បើអវយវៈណាមួយឈឺចាប់នោះអវយវៈទាំងអស់ក៏ឈឺចាប់ដែរឬបើអវយវៈណាមួយទទួលបានការសរសើរនោះអវយវៈទាំងអស់ក៏អរសប្បាយដែរ។ 27 អ្នករាល់គ្នាជារូបកាយរបស់ព្រះគ្រិស្ដហើយជាអវយវៈតាមផ្នែករៀងៗខ្លួន។ 28 នៅក្នុងក្រុមជំនុំព្រះជាម្ចាស់បានតាំងឲ្យមានពួកសាវកជាមុនទីពីរឲ្យមានពួកអ្នកនាំព្រះបន្ទូលទីបីឲ្យមានពួកគ្រូបន្ទាប់មកឲ្យមានអ្នកធ្វើការអស្ចារ្យបន្ទាប់មកទៀតអំណោយទាននៃការប្រោសឲ្យជាអ្នកជំនួយការអ្នកបម្រើការនិងអ្នកនិយាយភាសាចម្លែកអស្ចារ្យ។ 29 តើគ្រប់គ្នាជាសាវកឬ? តើគ្រប់គ្នាជាអ្នកនាំព្រះបន្ទូលឬ? តើគ្រប់គ្នាជាគ្រូឬ? តើគ្រប់គ្នាជាអ្នកធ្វើការអស្ចារ្យឬ? 30 តើគ្រប់គ្នាមានអំណោយទាននៃការប្រោសឲ្យជាឬ? តើគ្រប់គ្នានិយាយភាសាចម្លែកអស្ចារ្យឬ? តើគ្រប់គ្នាបកប្រែភាសាចម្លែកអស្ចារ្យឬ? 31 ដូច្នេះចូរអ្នករាល់គ្នាសង្វាតឲ្យបានអំណោយទានដែលប្រសើរជាងគេចុះហើយខ្ញុំនឹងបង្ហាញផ្លូវដ៏ប្រសើរបំផុតមួយដល់អ្នករាល់គ្នាទៀត។